उदयपुर, चैत २२ । उदयपुरमा विद्यालय जाँदै गरेकी एक छात्राको हत्या भएको छ । कोसी जनता माध्यमिक विद्यालय, रामपुरमा कक्षा १० मा अध्ययनरत बेलका नगरपालिका–३ बुद्धचौकीकी १५ वर्षीया कविता सुनवारको हत्या भएको हो । एसईईको तयारीका लागि ट्युसन पढ्न विद्यालय जाँदै गरेकी उनको जसोधा खोलामा शव फेला परेको हो ।
बिहान ४ बजे नै घरबाट विद्यालय गएकी बालिकाको बिहान ७ बजे स्थानीयले शव खोला किनारामा देखेपछि इलाका प्रहरी कार्यालय रामपुरलाई जानकारी गराएका थिए । घटनाको प्रकृति हेर्दा हत्या भएको देखिए पनि प्रहरीले यसको विस्तृत जानकारी अनुसन्धानपछि खुलासा हुने जनाएको छ । प्रहरी उपरीक्षक सुवासचन्द्र बोहोराले अनुसन्धानका क्रममा कर्तव्य गरी हत्या भएको जस्तो देखिए पनि अहिले नै यकिन गर्न नसकिने बताउनुभयो । उहाँले अनुसन्धानका लागि केन्द्र र प्रदेश प्रहरीसँग समन्वय भइसकेकाले अनुसन्धानपछि मात्र घटनाको पहिचान गर्न सकिने बताउनुभयो ।
घटनास्थल विद्यालयदेखि करिब ७ सय मिटर र घरबाट करिब दुई किलोमिटर पर रहेको स्थानीय भरत घिमिरेले बताउनुभयो । घिमिरेका अनुसार मृतक बालिकाको टाउकोमा चोट लागेको देखिन्छ । शवको प्रकृति हेर्दा कुटपिट गरी हत्या गरेको हुनसक्ने उहाँँले बताउनुभयो । घटनास्थललाई प्रहरीले सुरक्षा घेरामा राखेर अनुसन्धान गरिरहेको छ ।
कुकुरसहितको विशेषज्ञ टोली घटनास्थल पुगेको प्रहरीले जनाएको छ । स्थानीय र स्कुले बालबालिकाहरूले भने दोषीमाथि कारबाही गर्न माग गर्दै आन्दोलन सुरु गरेका छन् । नाराजुलुससहित निस्किएका विद्यार्थीले सडक र रामपुर बजारमा प्रर्दशन गरेका छन् । घटनामा संलग्न भएको आशंकामा १९ वर्षीय एक युवक र १७ वर्षीया किशोरीलाई नियन्त्रणमा लिइएको इलाका प्रहरी कार्यालय रामपुर ठोक्सिलाले जनाएको छ ।
