खोटाङ, साउन ८ । खोटाङमा सुस्त मनस्थिति भएकी महिलालाई बलात्कार गरेको आरोपमा एक युवा पक्राउ परेका छन् । सुस्त मनस्थिति भएकी महिलालाई ललाइ फकाइ गरी घरमै लगेर बलात्कार गरेको आरोपमा जिल्लाको रावा बेसी गाउँपालिका–२ खार्पाका ३२ वर्षका टेक बहादुर नेपाली पक्राउ परेका हुन् ।
सुस्त मनस्थिति भएकी २२ वर्षकी महिलालाई आइतबार बलात्कार गरेको परिवारको उजुरीको आधारमा प्रहरीले नेपालीलाई घरबाटै पक्राउ गरेको जनाएको छ । बलात्कार आरोपमा पक्राउ परेका टेकबहादुरलाई अदालतमा म्याद थप गरी अनुसन्धान भइरहेको जिल्ला प्रहरी कार्यालय खोटाङका सूचना अधिकारी प्रहरी निरीक्षक बेनु कार्कीले जानकारी दिनुभयो । उनले त्यी सुस्त मनस्थिति भएकी महिलालाई फकाएर आफ्नै घरमा लगेर बलात्कार गरेको आरोप छ ।
महिलाको अवस्था सामान्य रहेकाले उनी अहिले आफ्नै घरमा रहेको बताइएको छ । पक्राउ परेका टेक बहादुर नेपालीको श्रीमतीको केही महिना अघि मृत्यु भएको थियो । श्रीमतीको मृत्यु भएको केही समयमा उनी बलात्कार आरोपमा पक्राउ परेका हुन् ।
यस्तै, नाबालिकाकलाई ललाइफकाइ गरी बिहे गर्छु भनेर घरबाट भगाउने ऐसेलुखर्क गाउँपालिकाका एक युवा पनि पक्राउ परेका छन् । पक्राउ पर्नेमा ऐसेलुखर्क गाउँपालिका–१ राखावाङदेलका २२ वर्षका मुगाधन सार्की रहेका छन् ।
पक्राउ परेका सार्की बिबाहित पुरुष हुन् । उनले १६ वर्षकी बालिकालाई दोस्रो बिहे गर्छु भन्दै फकाएर भगाएपछि बालिकाको परिवारले दिएको उजुरीको आधारमा उनलाई पक्राउ गरिएको प्रहरी निरीक्षक कार्कीले बताउनुभयो ।