खोटाङ मंसिर ९ : खोटाङको रावाबेसी गाउँपालिकामा पहिलोपटक बैंकको शाखा विस्तार हुने भएको छ । जिल्लाका अन्य सबै पालिकामा विभिन्न बैंकका शाखा विस्तार भइसक्दा रावाबेसीमा भने हालसम्म कुनै पनि बैंकको शाखा विस्तार हुन सकेको थिएन । जनप्रतिनिधि र कर्मचारीको लामो समयको पहलपछि गाउँपालिका केन्द्र हरम्टार कुभिण्डेमा राष्ट्रिय वाणिज्य बैंकको शाखा विस्तार हुने भएको हो ।
राष्ट्रिय वाणिज्य बैंकले यसअघि जिल्लाका विभिन्न चार स्थानमा शाखा विस्तार गरिसकेको छ । रावाबेसीमा बैंकको ५ औँ शाखा विस्तार हुन लागको हो । त्यसका लागि आवश्यक सम्झौता भएको गाउँपालिका अध्यक्ष लिलानाथ निरौलाले जानकारी दिनुभयो ।
भवन निर्माणको आवश्यक प्रक्रिया अगाडि बढाउन रा.वा.बैंक १ नं. प्रदेश कार्यालय विराटनगर, रा.वा. बैंक शाखा कार्यालय दिक्तेल र गाउँपालिकाबीच आज (बिहिबार) सम्झौता भएको छ । तत्काललाई पुस ७ गते बैंकको उद्घाटन गरेर गाउँ पालिकाको केन्द्र नजिकै रहेको कर्मचारी आवास गृहको भवनमा बैंकको शाखा सञ्चालन गरिने र नयाँ भवन निर्माणपछि सारिने गाउँपालिकाले जनाएको छ ।
नेपाल सरकारले सामाजिक सुरक्षा भत्ता अनिवार्य बैंकिङ प्रणालीबाट वितरण गर्न निर्देशन दिएपनि गाउँपालिकामा बैंक नहुँदा समस्या भएको थियो । यस्तै सामान्य बैंकिङ कारोबारका लागिसमेत दिक्तेल पुग्नुपर्ने बाध्यता थियो । नजिकै बैंक नहुँदा गाउँपालिकामा सञ्चालन हुने योजनाका कामको कारोबारमा पनि कठिनाइ हुने गरेको थियो । अब गाउँपालिकामै बैंकको शाखा विस्तार हुने भएपछि यी सबै समस्या हट्ने गाउँपालिका अध्यक्ष निरौलाले बताउनुभयो ।