खोटाङ, फागुन १९ । खोटाङको हलेसी तुवाचुङ नगरपालिकाले मेलमिलापकर्ताहरूलाई पुनर्ताजगी तालिम प्रदान गर्न थालेको छ । ‘हाम्रो समस्या, हाम्रै समाधान : मेलमिलाप’ भन्ने नारासहित बिहिबारदेखि तीन दिने मेलमिलापकर्ता पुनर्ताजगी तालिम सुरु भएको हो । नगरपालिकाको आयोजना र मेडिएसन नेपालको सहजीकरणमा शुक्रबार र आइतबारसमेत सञ्चालन हुने तालिमको नगरपालिकाकी उपप्रमुख एवं न्यायिक समिति संयोजक विमला राईले उद्घाटन गर्नुभएको हो ।
स्थानीय स्तरमा उत्पन्न हुने सानातिना विवाद निरुपणमा मेलमिलापकर्ताको सहजताका लागि तालिमको आयोजना गरिएको नगरपालिकाको प्रशासन शाखाका कम्प्युटर अपरेटर सयन्द्र राईले जानकारी दिनुभयो । वडाहरूमा स्थापना गरिएका मेलमिलाप केन्द्रमा आउने उजुरी सकभर त्यहीँबाट समझदारी गराई निरुपण गर्न मेलमिलापकर्ताको क्षमता विकासका लागि तालिम महत्त्वपूर्ण रहने उहाँको भनाइ छ ।
तालिममा नगरपालिकाको ११ वटै वडाका मेलमिलाप केन्द्रबाट २७ जना मेलमिलापकर्ताहरू सहभागी छन् ।