खोटाङ, भदौ १३ । हलेसी तुवाचुङ नगरपालिकाले एसईईमा उत्कृष्ट हुने विद्यालय र विद्यार्थीलाई पुरस्कृत गरेको छ । शैक्षिक सत्र २०७९ को एसईई परिक्षामा नगरपालिका भरी प्रथम, दोस्रो र तेस्रो हुने विद्यालय र उत्कृष्ट एक जना विद्यार्थीलाई नगरपालिकाले पुरस्कृत गरेको हो ।
नगरपालिका भरीमा सबै भन्दा धेरै (३.२५) जिपिए ल्याउने महेन्द्रद्धोय माध्यमिक विद्यालयकी छात्रा कला राईलाई नगरपालिकाले ल्याप्टप र प्रमाणपत्रले सम्मान गरेको छ । यस्तै १२ वटा माध्यमिक विद्यालय रहेको नगरपालिकामा औसत जिपिएको आधारमा तीन विद्यालयलाई पुरस्कार प्रदान गरिएको नगर शिक्षा शाखा संयोजक पदम बहादुर कार्कीले बताउनुभयो ।
(२.३३४) जिपिएसहित महेन्द्रद्धोय माध्यमिक विद्यालय (महादेवस्थान) प्रथम भएको छ । प्रथम हुने विद्यालयलाई नगरपालिकाले रु ५५ हजार नगदसहित प्रमाणपत्र प्रदान गरेको छ । यस्तै, (२.१४३) जिपिएसहित सरस्वती माध्यमिक विद्यालय (अर्खौले) दोस्रो र (२.१०७) जिपिएसहित बुलापन्थे माध्यमिक विद्यालय (धितुङ) तेस्रो भएका छन् । दुई विद्यालयलाई क्रमश रु ४५ हजार र रु ३५ हजार नगदसहित प्रमाणपत्र प्रदान गरिएको कार्कीले बताउनुभयो ।
पुरस्कार ग्रहण गर्दै प्रथम हुने महेन्द्रद्धोय माविका प्रधानाध्यापक मनकुमार राईले विद्यालयमा शिक्षकको सिस्टम र विद्यार्थीको अनुशासन कायम गरेपछि शैक्षिक सुधार हुँदै गएको बताउनुभयो । नगरपालिकाले शिक्षामा गरिरहेको लगानिको प्रतिफल देखिदै गएको र यसलाई अझ बढाउन हौसलाका लागि विद्यालय र विद्यार्थीलाई पुरस्कार प्रदान गरिएको उपप्रमुख रमेश कुमार राउतले बताउनुभयो ।
मानवपुँजी निर्माणमा ध्यान नदिने हो भने भौतिक संरचना निर्माणले मात्र काम नगर्ने भएकाले शिक्षा क्षेत्रमा नगरपालिकाले धेरै लगानि गरिरहेको नगरप्रमुख विमला राईले बताउनुभयो । सोही अनुसार नगरपालिकाले शिक्षा क्षेत्रमा बजेट खर्च गरिरहेको छ । शिक्षा क्षेत्रको सुधारका लागि विभिन्न कार्यक्रम गरिरहेको नगरपालिकाले प्राप्त उपलब्धिलाई पुरस्कारमार्फत सम्मान गरिएको प्रमुख राईको भनाइ छ ।
यसैबिच, नगरपालिकाले ९० जना शिक्षको दरवन्दी समायोजन गरेको छ । धेरै विद्यालयमा स्थायी शिक्षक नभएकाले दरवन्दी समायोजन एवं तहगत मिलान गरिएको नगर प्रमुख राईले बताउनुभयो ।
